සෝනි, “කාබුල් එක්ස්ප්‍රස්” චිත්‍රපටය සහ මගේ අත්දැකීම

කාබුල් එක්ස්ප්‍රස් බොලිවුඩ් සිනමා පටයේ සෝනි කැමරාවක් අතැතිව රොයිටර් ඡායාරූප ශිල්පිණිය ජෙසිකා බෙක්හැම් ලෙස රඟ පෑ ලින්ඩා ඇරසනියෝ.

අනුරුද්ධ ලොකුහපුආරච්චි විසිනි

සෝනි සිය නිල කැමරා බවට පත් කිරීමට ඇසෝසිටය්ටඩි ප්‍රෙස් ගත් තීරණය පිළිබඳ පුවත, මාව මින් වසර දහ හතරකට පෙර අත්දැකීමක් පිළිබඳ මතකයට ⁣ගෙන ගියේය.

ඒ 2006 නොවැම්බර් මාසය විය. එම වකවානුව ලංකාව ජනමාධ්‍ය වේදීන්ට එතරම් යහපත් අවධියක් නොවීය. ශ්‍රී ලංකා රජය එක පසෙකින් එල් ටී ටීයට විරුද්ධව යුද්ධ කරන අතර එයට සමාන්තරව මාධ්‍යවේදීන්ට එරෙහිවද යුධ පෙරමුණක් අරඹා තිබුණි. එවකට රොයිටර් ප්‍රවෘත්ති සේවයේ සේවය කරමින් සිටි මගේ ප්‍රධාන වගකීම වූවේ යුද්ධය පිළිබඳ ඡායාරූප ගැනීම මගේ විය. ජාත්‍යන්තර ප්‍රවෟත්ති සේවයේ දිගු කාලීණ අත්දැකීම් සහ සබඳතා තිබුනද මටද මගේම වූ යුධ පෙරමුණු දෙකක් එකවර තිබුණි. එනමි උතුරේ යුද්ධය වාර්තා කිරීමත් දකු⁣ණේදී රජය විසින් ඇති කරන පොදු සහ පුද්ගලික මට්ටමින් වූ මාධ්‍ය අවහිරකම් වලට මුහුණ දීමත්ය. වක්‍රාකාරව රජයට පක්ෂපාත මාධ්‍ය හරහා සමාජය තුල යුද්ධය වාර්තාකරණ විදේශ මාද්‍යවලට එරෙහිව නිර්මාණය කල සතුරු ප්‍රතිචාරයන්ට මා ඒ දිනවල මුහුණ දෙමින් සිටියෙමි. එම පසුබිම තුල දිනෙක උදයේ කාර්යාලයට ගිය විට, ජිවිතාරක්ෂාව පිළිබඳ ඇතිවූ අවධානම් සහගත තත්වයක් නිසා හැකි ඉක්මනින් මාව විදේශ සේවයකට අනුයුක්ත කර ලංකාවෙන් පිට කිරීමට ප්‍රවෟත්ති සේවයේ ඉහල කාර්ය මණ්ඩලය තීරණය කළේය. මගේ හදිසි ගුවන් ගමන් පහසුකම් සැළසුම් කරන තෙක් ආයතනික ආරක්ෂක උපදෙස් අනුව රොයිටර් ප්‍රවෟත්ති සේවයේ ආරක්ෂක නිවාසයේ රැඳී සිටි මා පසු දින උදෑසණ පලමු ගුවන් යානයෙන් ඉන්දියාව බලා පිටත් වුනෙමි

ඉන්දියාවේ සිටි මගේ රොයිටර් කාර්ය මණඩලයේ සහ සගයින් සහ මුම්බාහි පුවත් පත් ඡායාරූප ශිල්පීන් මාව ඉතා සතුටින් පිළිගත් අතර මාස තුනක කාලයක් මම මුම්බායි නගරයේ රොයිටර් ප්‍රවෟත්ති සේවා කාර්යාලය මූලස්ථානය කර ගෙන ඉන්දියාවේ නගර ගනණාවක ඡායාරූප ගැනීමේ යෙදුනෙමි. මේ කාලය තුල මුම්බාහි නව බොලිවුඩ් චිත්‍රපටයක් ප්‍රදර්ශණය කිරීම ආරම්භ කලේය.  ⁣එය “කාබුල් එක්ස්ප්‍රස්” නම් විය. කබීර් කාන් අධ්‍යක්ෂණය කල එම චිත්‍රපටය අධිත්‍ය චොප්රාගේ නිශ්පාදනයකි. ජෝන් ඒබ්‍රහිම් සහ අර්ෂාඩ් වාසි රඟපෑ එය ඉන්දියානු ස්ටාර් නිව්ස් මාධ්‍ය කණ්ඩායමක් අෆ්ගිනිස්ථණයේ තලෙයිබාන් යටතේ වන ජන ජීවිත ගැන වාර්තා කරන්න යන ගමනක් පිළිබඳ කතාවකි. මුම්බාහියි රොයිටර් ප්‍රවෘත්ති සේවයේ මගේ සගයින් මෙම චිත්‍රපටය තිර ගත වීමට පෙර ඒ පිළිබඳ දැන සිටි අතර මාධ්‍යවේදීන් පිළිබඳ කතාවක් බැවින් එය නැරඹීමට යාමට මාවද උනන්දු කෙරීය.

.

එක් දිනෙක මා මගේ රොයිටර් සගයින් වන ආර්කෝ දත් ( 2004 ලෝකයේ හොඳම ප්‍රවෘත්ති චායාරූප ශිල්පියා world press photo winner) සහ පනිත් පරන්ජ්පේ ( දැන් ජේෂ්ඨ ප්‍රවෟත්ති ඡායාරූප ශිල්පී ප්‍රංශ පුවත් සේවය)  සමග ” කාබුල් එක්ස්ප්‍රස්” නරඹන්න මුම්බාහි රීගල් සිනමා හලට ගියෙමු.

චිත්‍රපටයේ කතාව ගලා යන අතරමගදී ඉන්දියාවේ සිට කන්දහාර්හි තලෙයිබාන් ප්‍රදේශයට යමින් සිටින ඉන්දියානු මාධ්‍යවේදීන් දෙපලට අතර මගදී තවත් ජනමාධ්‍ය වේදිනියක් මුන ගැසේ. ඔවුන් කතා කරන විට ඇය ඔවුන් දෙසට හැරෙන අතර එවිට ප්‍රෙක්ෂකයන්ට පෙනෙන්නේ ඇය සෝනි කැමරාවකින් ඡායාරූප ගනිමින් සිටි බවයි. චිත්‍රපටයේ එක් නිශ්පාදන අරමුණක් නම් සෝනි කැමරාව ඉදිරිපත් කිරීම බව ඒ දර්ශණයට අනුව වටහා ගැනීම අපහසු නොවෙි. එහෙත් ඉන්දියානු මාධ්‍යවේදීන්ට තමාව හඳුන්වා දෙමින් ඇය තමා ඇමරිකාවේ සිට පැමිණි බවත් රොයිටර් ප්‍රවෟත්ති සේවය වෙනුවෙන් වැඩ කරන බවත් පැවසීම අපට සිනහ නගන්නක් විය. 

එය එදා අපට එය ඉතා හාස්‍යජනක ජවනිකාවක් වූවේ අප තිදෙනාම ඒ වන විටත් රොයිටර් ප්‍රවෘත්ති සේවය වෙනුවෙන් යුධ කලාප වල වසර ගනනාවක් පුරා සේවය කර තිබූ නිසාම නොව, චිත්‍රපටියේ චරිතය රොයිටර් ප්‍රවෟත්ති සේවය වෙනුවෙන් සෝනි කැමරාවකින් ඡායාරූප ගැනීම නිසාය. ජාත්‍යන්තර ප්‍රවෟත්ති ඡායාරූප ශිල්පීන් හැම විටම චිත්‍රපටයේ අපට පෙන්වනවාක් මෙන් පසුබිමක වැඩකරනුයේ වෟත්තීය මට්ටමේ ඉහලම තලයක තිබූ ලයිකා, කැනන් හෝ නිකෝන් කැමරා බව නොරහසකි. 

එදා හාස්‍යජනක ලෙස බොලිවුඩ්හි කාබුල් එක්ස්ප්‍රස් චිත්‍රපටිය තුලින් ජාත්‍යන්තර ප්‍රවෟත්ති ඡායාරූප ශිල්පිණියකගේ අතට සෝනි කැමරාවක් දුන් ඔවුන්, අද එයින් වසර දහ හතරකට පසු ලෝකයේ දැවැන්තම ප්‍රවෟත්ති ජාලයක් වන ඇසෝසියේටඩ් ප්‍රවෟත්ති සේවයේ සියළුම ඡායාරූප ශිල්පීන්ට වෟත්තීය මට්ටමේ සෝනි කැමරා දීමට සමත් වීම සැබවින්ම සතුටට කරුණකි. සුභ පැතුම් සෝනි!